सिर्जना-सुनगाभा

आधी आँगन ढाकिनेगरी

दायाँ तर्फ

बाँया तर्फ

त्यो

भित्रीबारीको डिलभरी

टौवामुनीको कान्लाभरी

गमक्क

ढकमक्क

गुलाब, ढुङ्ग्री, पुतली, घण्टी-फूल

सर्वदा, भूइँचम्पा, रंग-बदल, जर्नेली फुल

पारीजात, जाई, र कामिनी फूल

प्रत्येक साल फेरिंदा

हरेक बसन्तमा

उस्तैगरी

यीनको

नशालु मनमोहकता चुमिरहन पाए

यीनको

बैंशालु अस्तित्व साक्षात्कार गरिरहन पाए।

**

घनघोर

खानी-खोलाको बन, बुंकोटपाखाको बन

ढाँडेको बन, उन्युघारीको बन

अविराम

बैखोलो, कसिनी-खोलो

मुरली-खोलो, भदुवार-खोलो

प्रत्येक नयाँ बर्ष

उसैगरी

यीनको

शान्त सुसाहट सुनिरहन पाए

यीनको

अविचलित

शालिन, भद्र उपस्थिती देखिरहन पाए

यीनको

जैविक विविधतामा जथाभावी नभए

अमूल्य

प्राकृतिक संपदामा

मानवकृत खलल नपुगे।

**

आँखाले नठम्याउञ्जेल

हराभरा

धान झुल्ने

बिरौटो-खेत, टारी-खेत, जुँडी-खेत

सबैतिर

असारे पन्ध्रको भरपुर दैनिकी

अनेकानेक

मौसमी छेक-छेकमा

विविध खेती फल्ने

खोरियाका पाटा, घरबारीका सुर्का, टारका गह्रा

रमाईलो

तर

बाह्रमासे व्यस्तता

प्रत्येक नयाँ साल

मंसिरभरी

उसैगरी

घरका पिंढी, फलैंचामा

धानका गह्रौं धोक्रा बिसाइएको देखिरहन पाए

उसैगरी

देश-परदेश भौंतारिई हिंड्नेहरुले

गुँड फर्किएर

आफ्नै माटोमा पसिना चुहाएको हेरिरहन पाए

सर्लक्क

पिता-पुर्खाका नासो

पवित्र कर्म-भूमि

सन्ततीका

सयौं वंश उर्वर रहिरहे।

**

धेरै पर

क्षितिज सम्म

छ्याङ्ग

सफा

सुन्दर देखिने निलो आकाश

माथि

गुफे-डाँडा, गौंथलेबाट

आमने-सामने जस्तो

छर्लङ्गै देखिने

सेता हिमाल

कतै गुजुमुज्ज

कतै फिंजारिएका

घरहरु

कलात्मक बस्तीहरु

कञ्चन

हरिया बन-पाखा

हरेक नव दिन

उसैगरी

आँखाको धित मरुञ्जेल

यो दुनिया

प्रदुषण-रहित देख्न पाइरहे

उसैगरी

आँत शितल होउञ्जेल

स्वच्छ हावाको निश्वास लिन पाइरहे

आम जनमानसमा

कार्बन उत्सर्जन बारे चेतना जाग्रत भइदिए

बैकल्पिक

नविकरणीय उर्जाका प्रयोग बारे

युद्धस्तरमा

समग्र पहल-कदमी अघि बढिदिए।

**

घघडान

साँस्कृतिक विविधता

अनगिन्ती

जातजाती, भाषाभाषी

परम्परागत

स्थानीय रहन-सहन

सनातन

जिवनशैलीगत

सामाजिक आवश्यकता

प्रत्येक फेरिने सालसँगै

सँधैं

उसैगरी

यीनमा

आपसी मर्यादाको माहोल घन्किइरहे

यीनमा

स-गौरव सह-अस्तित्व

सबैलाई स्वीकार्य भइरहे

दूर-दराज सम्म

आफ्नो मौलिक पहिचान फुलिरहे।

**

बृहत

संयुक्त परीवार

सखारै

खेतमा पानी पटाउन हिंडेका बुबा

दिनभरी

भान्सा, घर-धन्दामा जुटेकी आमा

एकाबिहानै

हिंजाको मेलो सक्न निस्केका दाजु

दिन-परदिन

पर्म तिर्न खटिएकी बहिनी

ठूलो

पाथी पाक्ने कसौंडीमा

खुर-मुनि धानको भात

ओहो,

हरेक नयाँ वर्ष

उसैगरी

यी

बुबा-आमा, दाजु-भाउजू

दिदी-बहिनी, भाइ-बुहारी र केटाकेटी

एकैसाथ

लहरै

पिर्का, चकटीमा बसेर

सुखको मानोमा रमाइरहेका देख्न पाइरहे

उसैगरी

ठूलो जहान

मकै-भटमासका तालमा

कहिले

गोठाला र दाइँ-बरातुका कुरामा

कहिले

औंसी-पूर्णे र ढिकी-जाँतोका कुरामा

बिन्दास

मस्तसित हराइरहेका हेर्न पाइरहे

निश्चिन्त

न्यानो

उदाहरणीय

पारिवारीक थिति चलिरहे।

**

सारा

नयाँ आउने समय

तमाम

यो बिचित्र पृथ्वीतलभरी

बसन्तका पालुवा, पिपिरा

बरोबर छुटिरहे

प्रकृतिमा

निख्खर सामञ्जस्य

अबिच्छिन्न कायम भइरहे

असारका

कर्मयोगी जुटिरहे

मंसिरको

बेफुर्सदी बयली खेलिरहे

जुगौं-जुग

सकल मानव जातीलाई

विशुद्ध प्राणवायुले स्पर्श गरिरहे

हरेक

छर-छिमेकभरी

गाउँघरभरी

बस्तीभरी

शहर-बजारभरी

आदर्श

आफ्नो पहिचान

ज्वलन्त फैलिइरहे

सौम्य

सुसंस्कृत

अनुकरणीय

पारिवारीक सौहार्दता छाईरहे

आफन्ती माया मौलाईरहे

सदा-सदा

शताब्दिऔं-शताब्दी

युगौं-युग

मान्छे

स्वार्थ हैन

मान्छे हुनुको अर्थले

मान्छे भएर

बाँचिरहे

अनन्त

अनन्त।

**  **

नव वर्ष वि.सं. २०७६ का अवसरमा…..