सिर्जना-सुनगाभा

झिनो झल्कोमै, सारा ध्यान तोडिन्छ किन हो

बिर्सुं भन्छु, मन उतै मोडिन्छ किन हो।

**

आगो खेल्दिन, बाटो अर्कै हिंड्छु भन्छु

उनैसित, झ्वास्सै नजर जोडिन्छ किन हो।

**

ढाँटी बाँच्दिन, भा’को साँचो बोल्छु भन्छु

दिनदहाडै, साथ नैं सब् छोडिन्छ किन हो।

**

रीस् म साँच्दिन, सभ्य-शिष्ट रोप्छु भन्छु

निष्ठुरी, दुश्मनी झन् गोडिन्छ किन हो।

**

मैत्री उनेर, समझदारी फुल्छु भन्छु

विश्वास् त, बोहनी मै फोडिन्छ किन हो।

**  **